Иванов: Мојот говор не ги предизвика инцидентите

Добивај вести на Viber

Од Кабинетот на претседателот Ѓорге Иванов синоќа соопштија дека жалат за инцидентот на прославата на Илинденското востание во Крушево за 2 Август, но дека тој не бил предизвикан од пораките во говорот на претседателот.

Пред говорот на Иванов, нападната беше делегацијата на Владата предводена од вицепремиерот Кочо Анѓушев, додека при положувањето на венците имаше погрдни извикувања, свирење и навредливи песни, за што привремено и МРТ го прекина преносот и се врати во студио.

 „Петседателот на Република Македонија никогаш не поддржувал инциденти и говор на омраза. Жалиме што владината делегацијата беше исвиркана на одбележувањето на празникот Илинден на Мечкин Камен во Крушево, но сметаме дека тоа на ниту еден начин не беше предизвикано од пораките упатени од претседателот Иванов“, пишува во реакцијата на Кабинетот на Иванов. 

Оттаму и порачуваат на Владата самата да се праша зошто македонскиот народ на тој начин реагира кон владините претставници и, како што се наведува, таа да преземе одговорност зошто народот е поделен и шири говор на омраза кон државните институции и неистомислениците.