ИЗРАЕЛЦИТЕ ПРОТЕСТИРАА: Хамас не сака да слушне за враќање на заложниците

Добивај вести на Viber

Израелците протестираа барајќи враќање на заложниците, но Палестинците од Хамас не сакаат да чујат за тоа. Членови на семејствата на заложниците кои ги држи палестинската терористичка група Хамас во Газа упаднаа денеска на состанокот на комисијата за финансии во израелскиот Парламент, извикувајќи „нема да седите овде додека таму тие умираат“.

Членовите на семејствата синоќа поставија шатор во Ерусалим и ветија дека ќе останат таму додека Владата не постигне договор за ослободување на некои од заложниците. Роднините на заложниците ги интензивираа протестите во последните денови, барајќи Владата да направи повеќе за ослободување на нивните блиски. Израелскиот премиер Бенјамин Нетанјаху вети дека ќе ја продолжи офанзивата до „тотална победа“ против Хамас и дека ќе ги врати сите преостанати заложници.

Додека израелските сили го засилуваат нападот врз Кан Јунис во јужниот дел на Газа, високиот функционер на Хамас, Сами Абу Зухри, изјави дека одбивањето на израелскиот премиер Бенјамин Нетанјаху да ги запре воените операции „значи дека нема шанси за враќање на израелските заложници“. Хамас, како што пренесува Ал Џезира, бара траен прекин на бомбардирањето, повлекување на копнените трупи од Газа и ослободување на палестинските затвореници од израелските затвори во замена за 136 заложници. Израелскиот премиер Бенјамин Нетанјаху ги отфрли барањата на Хамас.

Шефот за надворешна политика на Европската унија, Жозеп Борел, изјави дека начинот на кој Израел ја спроведува својата војна против Хамас во Појасот Газа „сее омраза со генерации“. 

Шпанија ќе се залага за траен прекин на огнот во Појасот Газа и признавање на палестинска држава на состанокот на министрите за надворешни работи на Европската унија во Брисел. Хамас на 7 октомври лани го нападна Израел, а во операцијата на израелската армија во Газа загинаа над 25.000 Палестинци. 

Фото EPA-EFE/MOHAMMED SABER