ЈУЖЕН ТЕК: Казна за Бугарија, подарок за Турција

Добивај вести на Viber

Европската унија практично и подари еден крак од гасоводот наменет за Европа на Турција, вели првиот човек на „Гаспром“ Алексеј Милер, објаснувајќи ја одлуката за запирање на проектот за изградба на гасоводот Јужен тек. Во интервју за руската државна телевизија, Милер нагласил дека благодарение на непопустливоста на ЕУ, губитник испаднала една европска држава - Бугарија, додека добивка извлекла Турција. „Во моментов во Бугарија транзитно се испорачуваат 18 милијарди кубни метри гас наменет за Турција, Македонија и Грција. По реализирањето на проектот за морски гасовод кон Турција сите овие количини ќе поминат низ турска територија, а не преку Бугарија. Таа ќе го загуби статусот на транзитна држава. За Бугарија без сомнежи сега ситуацијата е комплицирана, пред сè затоа што не само што ќе ги пропушти сите бенефиции, но и ќе ги почувствува директните загуби. Таму нема да бидат инвестирани над 3 милијарди. евра, а исто така нема да бидат отворени над 6.000 работни места“, објаснува Милер. Тој наведува дека Турција сега е нов стратешки партнер за Русија во гасниот бизнис - преку нејзина територија ќе се пренесуваат околу 50 милијарди кубни метри гас што ќе го зголеми и нејзиниот геополитички статус во регионот. Изградбата на гасоводот Јужен тек била запрена токму на денот кога бродот на италијанската компанија „Сајпем“ влегол во водите на Црното Море со намера да поставува цевки на дното за изградба на гасоводот. Неговите активности морале да бидат запрени, бидејќи Бугарија до последен момент не дала согласност за поставување цевки во нејзините територијални води.