Се менува законот за санација и реконструирање на банки
Објавено во: Финансии 18 Февруари, 2013
Собранието во попладневниот дел од 55-та седница ја почна расправата за Предлог-законот за изменување на Законот за санација и реконструирање на дел од банките во Република Македонија, во прво читање.
Како што образложи министерот за финансии Зоран Ставрески, со измените се предвидува намалување на трошоците од буџетот на Република Македонија по основ на вршење административно-евиденциски работи и сметководствени услуги во корист на Министерството за финансии, кои сега се плаќаат кон Стопанска банка за дадени денарски кредити.
„Обврските произлегуваат од договор склучен меѓу Македонија, Министерството за финансии и Стопанска банка. Согласно Законот за санација и реконструирање на дел од банките во Република Македонија и со оглед на тоа дека станува збор за значителни трошоци, се предлага Министерството за финансии да ја преземе документацијата за денарските пласмани кои биле пренесени како побарување на Македонија во процесот на санација на Стопанска банка во 1995 година“, посочи министерот.