Какво решение за излез од кризата предлага Левица?

Добивај вести на Viber

Од Левица велат дека навидум нерешливата политичка криза, која се заканува да предизвика тешки последици по нашето општество, може да се надмине, но потребна е политичка волја кај партиите кои ја доведоа ситуацијата до точка на вриење. 

Партијата нуди концепт за надминување на политичката агонија, во која, како што соопшти, нѐ доведоа неодговорните партии и елити. Концептот вклучува мораториум на Албанската платформа, транспарентност на преговорите за влада, институциите да работат во согласност со своите уставни надлежности, како и прекин на протестите.

Левица смета дека парламентарните албански политички партии, ако навистина сакаат да се подобри животот на обичните граѓани Албанци, треба да се фокусираат на решавање на суштинските проблеми кои нив ги мачат.

„Со затскривањето зад етничките барања само ја покажуваат својата незаинтересираност за подобрување на животот на обичните Албанци“ - велат од  Левица.

Што се однесува до работата на институциите, од партијата велат дека граѓаните не гласаа за нефункционален парламент, каде што пратениците ќе земаат плата, а нема да работат. Затоа, најитно е потребно пратениците да ги испочитуваат Уставот и Деловникот и да го конституираат Собранието, а претседателот да го предаде мандатот, овојпат согласно со Уставот, и со тоа да се стави крај на институционалната криза.

„Левица искрено се надева дека оние партии и елити кои го создадоа хаосот, ќе изнајдат сила и доблест да ретерираат од некои свои позиции со цел да ја надминеме кризата што побргу и помалку штетно, за да конечно на дневен ред дојде решавањето на проблемите со осиромашувањето и обесправувањето на народот“- стои  во партиското соопштение.

Левица порачува дека за да се смират страстите и да спласне тензичната атмосфера меѓу граѓаните, итно треба да престанат ваквите протести, кои несомнено имаат поддршка од ВМРО ДПМНЕ.