КАКВО „ЗЛАТО“ БАРААТ ИНВЕСТИТОРИТЕ ВО КОМЕРЦИЈАЛНА БАНКА - со блокови и редовно вчера направен промет од над 700 илјади евра

Добивај вести на Viber

Нови блокови и големи истргувани количини и на редовниот пазар со акциите на Комерцијална банка се случуваат на Македонската берза. 

Вчерашниот ден бил особено „жежок“, бидејќи поминаа два блока од по 200 и 220 акции на банката по цена од 31.000 денари за акција, а големо тргување со акциите имало и на редовниот пазар, кога се продадени дури 1.005 акции, по просечна цена од 30.960 денари.

Се чини како за интересот и за цената на акциите на Комерцијална банка да нема лимит, а тоа уште повеќе го поттикна и најавата дека за минатата година банката ќе дели дивиденда, а имајќи ја предвид нејзината одлична дивидендна политика и историја во минатите години, се очекува дека тоа ќе биде прилично солидна сума, што е уште еден тригер плус за инвеститорите да навалат на оваа акција. 

Ако направиме соодветни пресметки, може да се види дека при блоковите се платени вкупно околу 220 илјади евра за 420 акции на Комерцијална банка.

Додека, пак, на редовниот пазар се продадени 1.005 акции, по просечна цена од 30.960 денари за акција, што значи дека таму е направен промет од 506 илјади евра, или над половина милион евра.  

Денеска, пак, има благ пад со акциите на Комерцијална банка и тие во досегашните тргувања се продавале просечно по 30.936 денари за акција.

Н.Н.Ф.