Ќе има ли ново “кастрење” на грчкиот долг?

Добивај вести на Viber

Кредиторите на Грција ќе започнат преговори за потребата од  дополнително олеснување на долговите на долг период, откако Брисел потврди дека Атина има постигнато примарен буџетски суфицит минатата година. Европските власти пак потенцираа дека не може да се очекува ново отпис на грчкиот долг, за што инсистираше Меѓународниот монетарен фонд (ММФ). Поголемиот дел од грчките обврзници се чуваат од владини кредитори, што би значело дека ново отпишување на долгот би предизвикало директни загуби за владите на земјите од еврозоната. Се очекува сепак претставници на девизниот блок да го  продолжат понатаму рокот на спасувачките заеми за нашиот јужен сосед, како и да ги намалат каматите на нив. Иако тоа нема да доведе до пад на износот на долгот на Грција, кој во 2013 година достигна рекордни 175% од бруто домашниот производ (БДП), сепак овие мерки значително би и ја  олесниле работата на Атина. Евростат вчера потврди дека примарниот суфицит на Грција за минатата година достигна 0,8% од БДП (над 1,5 милијарди евра). Од Еврокомисијата потврдуваат дека во врска со тоа ќе има преговори за евентуални олеснувања на должничкото бреме. Според извори од грчката дипломатија Атина најверојатно ќе го покрене ова прашањето уште на следната средба на Еврогрупата. Поголемиот дел од примарниот суфицит сепак нема да оди за намалување на долговите на земјата, туку за тековните плаќања. К.К.