Коцијанчич порача Иванов да овозможи формирање нова влада во Македонија
Објавено во: Македонија 10 Март, 2017
Европската Унија го повикува македонскиот претседател Ѓорге Иванов да го преиспита својот став и да овозможи формирање нова влада во Македонија.
Ова го порача Маја Коцијанчич, портпаролката на високата претставничка на ЕУ за надворешна политика и безбедност Федерика Могерини, пренесува агенцијата СРНА.
Таа повтори дека е неопходно Иванов да го почитува изборниот резултат, да постапува според Уставот, да го почитува собраниското мнозинство и да дозволи демократскиот процес нормално да тече.
Коцијанчич вели дека ЕУ е запозната со писмото кое го испратил Иванов и дека уште пред седум дена ЕУ испрати јасни пораки.
Пред два дена Иванов испрати писмо до претседателот на САД, Доналд Трамп, до ЕУ, НАТО и до претседателот на Турција, Реџеп Таип Ердоган да ја осудат и отфрлат тиранската платформа на албанските партии бидејќи нејзината содржина е опасна за Македонија.