КОГА НА ДРЖАВАТА Ѝ ТРЕБААТ ПАРИ, ДОМАШНИТЕ БАНКАРИ ТРИЈАТ РАЦЕ - ново задолжување од 50 милиони евра, еве колкави се каматните стапки

Добивај вести на Viber

Ново задолжување на државата кај домашните банки се случило во претходните денови, а формата е издавање на државни обврзници.

Сума од 50 милиони евра е земена сега, а ќе им се враќа во следните 15 години на кредиторите кои и зајмат на државата на домашен терен, а тоа се претежно комерцијалните банки, но и пензиските фондови, на кои ова им е најсигурен начин за вложување на нивните пари, бидејќи гарант е државата, а со оглед на високата каматна стапка, станува збор и за доходовно вложување, бидејќи им се слеваат огромни суми на каматни приходи.  

Берзата вчера извести дека кај неа дошле на котација две државни обврзници издадени од Министерството за финансии, од кои едната на сума од нешто повеќе од 40 милиони евра, додека другата, пак, близу 10 милиони евра.

Заеднично за двете обврзници е дека парите се земени сега, а ќе се враќаат дури до 2039 година.

Каматните стапоки, и покрај благото попуштање, не се воопшто ниски и ја задржуваат границата над 5 проценти, што говори дека и натаму ќе следува голем државен трошок на име на исплаќање на камати кон домашните кредитори.

Да одиме со ред.

Стартувајќи од денеска, како што извести Берзата, на Официјалниот пазар на потсегментот Берзанска котација ќе бидат примени на котација државните обврзници без девизна клаузула, со вкупна вредност на емисијата од 40,1 милиони евра. Тие биле издадени на 12 април, а ќе достасаат целосно на истиот датум во 2039 година.

Нивната каматна стапка е 5,6 отсто, што е повеќе дури и од просечната каматна стапка која за земените кредити ја плаќаат компаниите и граѓаните во земјава.

Вториот вид на хартии од вредност кој се емитува се државни обврзници со девизна клаузула, и со вкупна вредност на емисијата од 9,42 милиони евра. Издадени се и достасуваа исто на 12 април 2039 година.

Нивната стапка е само малку пониска, или 5,35 проценти, што повторно говори дека влегувањето во задолжување за да се покрие буџетскиот дефицит, се повеќе ја чини државата.

Сепак, треба да се има предвид дека во најкризните моменти на највисоки каматни стапки, беа издавани и државни обврзници со камати од над 6 проценти.

Н.Н.Ф.