Колку должи Македонија?

Добивај вести на Viber

На барање на опозицијата во Собранието денеска треба да се отвори расправа за висината, структурата, транспарентноста и намената на јавниот долг на Македонија. Опозиционерите очекуваат Владата да реферира за состојбата со задолженоста, затоа што до сега се објавувале само оскудни податоци. Согласно законот за јавен долг владата до пратениците треба да доставува годишни извештаи за управување со јавниот долг, но такви извештаи не биле доставени за 2010 и 2011 година. Извештајот за 2012-та покажал дека нивото на јавниот долг расте, тврдат пратениците од СДСМ, кои се предлагачи на иницијативата. „Таму јасно се гледа дека и јавниот долг и долгот на централната влада се зголемуваат и веќе ги имаат пробиено таргетите или целите што Владата ги има поставено со стратегијата за управување со јавниот долг, а тоа е јавниот долг да не надминува 40 проценти од БДП. Според податоците од 2012, јавниот долг изнесува повеќе од 45 проценти од БДП“, изјавил за Радио Слободна Европа пратеникот на СДСМ Марјанчо Николов. Според последните објавени податоци, на крајот на ноември јавниот долг на Македонија бил 34 отсто од БДП, односно изнесувал 2,73 милијарди евра. Министерот за финасии, Зоран Ставрески презентирајќи го буџетот за годинава изјави дека јавниот долг ќе се одржува на умерено ниво, а за следните години се предвидува раст кој заклучно со 2016 година не смее да биде повисок од 37,6%.