Колку пратки изгубиле лани од „Македонски пошти“?

Добивај вести на Viber

Граѓаните забележале дека дел од пратките пратени по пошта се случува да доцнат, а понекогаш пратката воопшто не стига на наведената адреса.

Сите имаат различни искуства за обични, но и препорачани пратки.

„Во последниве неколку години во повеќе наврати имав потреба да праќам, но и да добивам писма, пратки преку пошта. Она што забележав е дека за одредени градови, пратките стигнуваат многу брзо, а за други населени места патуваат со денови. На пример, ми се случи до Струга за ден и пол да стигне писмо, и тоа беше многу брзо, за што дури без изненадена,  до Гостивар и Струмица да стигне писмо за три дена, и две практи до Скопје да се изгубат. За четири дена ми стигна пратка во Свети Николе, и за исто толку време писмо беше доставено во еден главен град на соседна држава, иако се работи за различна далечина“ - вели корисничка на услугите на „Македонски пошти“.

Минатата година „Македонски пошти“ изгубиле стотина пратки кои биле испратени во земјава и надвор од неа, а дел од нив биле оштетени или задоцниле, тврдат од пошти.

„Од вкупниот обем на поштенски пратки во внатрешниот поштенски сообраќај обезбеден преку АД „Македонска пошта“ – Скопје како давател на универзална поштенска услуга за целата територија на Република Македонија, кој за 2017 година изнесува приближно 35 милиони, има поднесено 1405 рекламации за пратки од внатрешен сообраќај што изразено во проценти изнесува 0,004 %. Од овој број на поднесени рекламации оправдани се само 83, што значи дека само 83 пратки се изгубени, оштетени или задоцнети. Од вкупниот обем на поштенски пратки во меѓународниот поштенски сообраќај обезбеден преку АД „Македонска пошта“ – Скопје како давател на универзална поштенска услуга за целата територија на Република Македонија, кој за 2017 година изнесува приближно 3.2 милиони, има поднесено 635 рекламации за пратки од меѓународен сообраќај што изразено во проценти изнесува 0,019 %. Од овој број на поднесени рекламации оправдани се 48, што значи дека само 48 пратки се изгубени, оштетени или задоцнети“ - велат од „Македонски пошти“.

Оттаму додаваат дека АД „Македонска пошта“ – Скопје, презема одговорност во случај на губење, оштетување и задоцнето врачување согласно Законот за поштенските услуги и останатите подзаконски и нормативните акти на друштво.

„Преносот на поштенските пратки помеѓу Главниот поштенски центар и градовите се одвива редовно согласно важечки Ред за превоз и рокови за пренос предвидени во Законот за поштенските услуги. Им стоиме на располагање на корисниците на поштенски услуги да ни се обратат со конкретни податоци односно за кои пратки и за кои населени места се работи, како би можеле да преземеме мерки во наша надлежност“ - додаваат од „Македонски пошти“.

Граѓаните доколку испратат препорачана пратка, тогаш можат и електронски да следат до каде е доставата.

Сања Атанасовска

фото Pixsell