Комерцијална банка лани со намалена добивка, повеќе доделени кредити

Добивај вести на Viber

Нето добивката на Комерцијална банка лани изнесувала 9,1 милион евра, што е за 48,2% помалку од претходната година, објави банката во известувањето до Македонската берза. Финансискиот резултат е одраз на економскиот амбиент во државата во втората половина од годината, што допринело фирмите да немаат капацитет да ги сервисираат обврските кон банката. Ваквата состојба предизвикала влошување на квалитетот на кредитното портфолио. Зголемување на приходите, Комерцијална забележала од останато работење, кои изнесуваат 12 милиони евра што е зголемување за 152,8% од 2011 година и е резултат на остварувањето на капитална добивка од трансакцијата за продажба на деловните згради на банката. Кредитите дадени на комитенти (на нето основа) се во износ од 45.697,4 милиони денари што е пораст од 6,3% во однос на 2011 година. Во рамки на вкупната актива, позицијата активни временски разграничувања и останатата актива бележат намалување од 16,6% како резултат на намалената состојба на преземените средства врз основа на ненаплатени побарувања. Депозитите на комитентите пак, достигнале износ од 69.113,5 милиони денари, што е пораст од 3,4% во споредба со 2011 година.