Комората додели 27 признанија на компании кои инвестирале дома и 8 кои инестирале во странство

Добивај вести на Viber

На компаниите кои инвестирале во време на криза и дома и во странство Стопанската комора на Македонија, денес им додели благодарници. -Вие покажавте капацитет да го креирате и реализирате својот економски и конкурентен имиџ, справувајќи се со сите предизвици на глобалната економска криза. Успеавте да ја задржите самодовербата, втемелена во сопствените ресурси и со примена на различни стратегии да ја остварите својата визија во борба за повисока конкуретност на либерализираниот пазар, со што го одржавте оптимизмот во бизнис-заедницата“, истакна претседателот на СКМ, Бранко Азески. Меѓу најхрабрите компании кои инвестирале дома во криза се прогласени Бучим од Радовиш, винарницата Стоби,Феро Инвест од Скопје, Градско, Мега Солар од Скопје, Текома од Штип, ЕЛЕМ - Скопје, Арчелормитал - Скопје, Скопски легури - Скопје, Џонсон Мети - Скопје, ИГМ Трејд - Кавадарци, Пекабеско - Скопје, Випро - Гевгелија, Алаијанс Уан Македонија - Кавадарци, Сокотаб - Битола, Везе Шари- Желино, Магпрогрес - Виница, Римес - Скопје, Млекара Здравје Радово, Рима-Стил - Скопје, Микросам - Прилеп, Агрометал - Скопје, Раде Кончар - Скопје, Стил Кон - Куманово, Алкалоид - Скопје и ДПТУ Хемија-комерц - Велес. Николајчо Николов од „Бучим“ најави нови 35 милиони евра инвестиции, дециден е дека кризите може да се пребродат со добро менаџирање. - Изминатата иако беше карактеризирана како кризна година ја завршивме успешно. Првпат почнавме производство на катоден бакар и го извезовме, направивме рекордни ископи на рудна маса. Но, имаме амбициозни планови и за наредните 12 месеци, истакна Николов. Наградени за нови погони отворени во странство се Алкалоид - Скопје, Ренова - Тетово, Урбан инвест од Кавадарци, Адинг Скопје, Бријант од Штип, Промес - Скопје, Дасто - Скопје и Брако од Велес. - Во изминатите пет години отворивме фирми во Русија, каде што има 70 вработени, во Украина каде што има 40 и во Словенија со 30 вработени, изјави директорот на „Алкалоид“, Живко Мукаетов .