Ковачевски: Ние сме Европа во мало, не треба да имаме проблем други заедници да влезат во Уставот

Добивај вести на Viber

Премиерот Димитар Ковачевски вечерва во „Тема на денот“ на Сител телевизија истакна дека по завршувањето на процесот на скрининг и отпочнувањето на преговорите по поглавја, ќе треба да направиме уставни измени во кои што ќе треба да бидат вклучени делови од други народи кои што живеат во државата а кои што не се впишани во преамбулата.

„Во моментот зборуваме за Бугарите, Хрватите, Црногорците, меѓутоа веќе и деловите од израелскиот народ изразија таква желба, Египќаните веќе доставија официјално барање. Ние сме мултикултурно, мултиконвенционално општество и сме докажани како такви во Европа, практично ние претставуваме општество кое што е Европа во мало бидејќи Европа е заедница на различности и јас сметам дека не треба да има проблем во однос на тие уставни измени”, рече Ковачевски.

Премиерот Ковачевски истакна дека Република Северна Македонија веќе ги има отпочнато преговори со ЕУ, календарот на скрининг процесот веќе е објавен, на 14-ти септември тимовите ќе бидат во Брисел, каде што и официјално се одржува првиот состанок.