Крајната десница за прв пат победи на избори во Австрија по Втората светска војна

Добивај вести на Viber

Слободарската партија на Австрија (ФПО) победи на парламентарните избори, прва победа на крајната десница по Втората светска војна, но сепак неизвесно е тоа дека ќе состави влада.

Според прелиминарните резултати, ФПО освоила 29,2 отсто од гласовите, додека Австриската народна партија (ОВП) на канцеларот Карл Нехамер доби 26,5 отсто од гласовите. Централно-левичарската Социјалдемократска партија има 21 отсто од гласовите, според АП.

Лидерот на ФПО, Хербер Кикл, поранешен министер за внатрешни работи и долгогодишен стратег, кој е на чело на партијата од 2021 година, сака да биде канцелар, но за да го стори тоа ќе треба да најде коалициски партнер за да обезбеди парламентарно мнозинство.

Сепак, лидерите на спротивставените партии најавија дека немаат намера да соработуваат со Кикл во новата влада, потсетува АП.

Ројтерс пренесува дека најверојатното партнерство на Кикл е со ОВП, која, како и тој, сака да воведе построги регулативи за имиграција.

55-годишниот Кикл пред изборите вети дека ќе ги депортира барателите на азил и дека ќе престане да ја поддржува одбраната на Украина од Русија.

Вчера Нехамер повтори дека нема да го назначи Кикл за канцелар во коалициската влада, додека Кикл вети дека нема да ја предаде челната функција на Австриската народна партија доколку ги победи. Тој рече дека ќе го следи политичкиот модел на унгарскиот премиер Виктор Орбан.

Лидерот на социјалдемократите Андреас Баблер вчера изјави дека би бил подготвен да размисли за коалиција со Нехамер.

Во Австрија преговорите за формирање на владејачка коалиција традиционално траат со месеци, а не со недели, така што преговорите би можеле да се одолговлекуваат до следната година, пишува Блумберг.