КРЕДИТИ: Априлски пад на кредитирањето!

Добивај вести на Viber

Во април вкупната кредитна изложеност на банките изнесувала 3 милијарди и 841 милион евра. Во однос на март, за првпат од почетокот на годинава е регистрирано намалување на кредитната активност за близу 5 милиони евра. Во истиот месец, најновите податоци на Народната Банка укажуваат дека продолжува трендот на раст на сомнителните и спорните побарувања кои достигнаа ниво од 428,5 милиони евра. Во однос на март, НБРМ измери пораст на нефункционалните кредити и кај девизната и кај денарската изложеност. Еве колку изнесува вредноста на сомнителните побарувања: Март 418 милиони евра Април 428 милиони евра Според податоците, од аспект на валутната структура, намалување на кредитната активност има кај девизните кредити, додека кај денарските е забележан пораст. Во истиот месец има намалување на кредитирањето кај приватниот сектор, додека кај домаќинствата растот продолжува. Во април во однос на март, задолженоста на граѓаните се зголемила по основ на денарски потрошувачки и станбени кредити, додека кај автомобилските кредити, кредитните картички и минусните салда се забележува намалување. По основ на потрошувачки кредити населението должи 711 милиони евра, а по основ на кредитни картички 194 милиони евра. Задолженоста на граѓаните за станбени кредити изнесува 377 милиони евра. Според проекциите на Народната банка за годинава се очекува кредитен раст од околу 8%. “Се очекува дека растот на депозитите и расположливите странски кредитни линии, подобрените согледувања на банките за ризиците и подобрувањето на глобалниот амбиент ќе овозможат одржување на стапките на кредитен раст на нивото од 7% до 8% годишно, во 2014 и 2015 година“, објави гувернерот на НБРМ Димитар Богов при презентација на Ревидираните економски показатели за годинава. Д.А.