Кредитниот рејтинг останува стабилен, Владата задоволна

Добивај вести на Viber

Вицепремиерот Зоран ставрески е задоволен од потврдата на кредитниот рејтинг на земјава од Агенцијата „Фич“ кој останува стабилен или „ББ+“. Ова за вицепремиерот е признание за економските политики,  а за него ова е значајно бидејќи се праќа добар сигнал кон странските инвеститори. „Исто така, со оценката се праќа и сигнал до банкарските институции, инвестициските фондови и сите оние кои во иднина треба да учествуваат во купувањето на државните обврзници на РМ при евентуална емисија дека РМ е земја со здрави макроекономски индикатори и е различна од земјите во соседството кои имаат многу повисоко ниво на задолженот и многу пониски стапки на раст“, рече Ставрески. Според вицепремиерот,  рангирањето на „Фич“ е резултат на подобрените проекции за економскиот раст на земјата и умерените буџетски дефицити, а посочи и дека Владата очекува и годинава растот на македонската економија да биде повисок од проектираниот на 2 отсто. „Добро е е да бидеме подобри од она што сме проектирале во делот на економскиот раст. Секако на страна на реализацијата на приходите и расходите до крајот на годината очекувам повисок степен на реализација во однос на претходните години, бидејќи во првите осум-девет месеци имаме подобра реализација на капиталните инвестиции“, изјави Ставрески. Тој потенцираше дека расте бројот на агенции и меѓународни финансиски институции што предвидуваат зголемување на економскиот раст за 2013 година за РМ и дека со секој нов извештај добиваме потврда дека нивните видувања на македонската економија се позитивни и оти македонската економија ќе има повисок економски раст. Агенцијата за кредитен рејтинг „Фич“во првите шест месеци годинава го намали кредитниот рејтинг на повеќе земји меѓу кои и Велика Британија, Холандија  и Италија.