Летото го зема данокот – расте бројот на сообраќајни незгоди
Објавено во: Мои пари 12 Август, 2013
Најголем број на сообраќајки со тешки последици се случуваат во јули и август од 11 до 17 часот. Ова е заклучокот на претставниците на Републичкиот завод за безбедност на сообраќајот(РСБСП) од каде информираат дека на високите температури расте бројката на сообраќајни несреќи во земјава. Како главни причини се споменуваат човечкиот фактор и непочитувањето на сообраќајните правила и прописи, главно преку пребрзото возење.
Лани 132 жртви имало на македонските патишта. Притоа јуни, јули и во август, има за 40 проценти повеќе сообраќајќи во споредба со остатокот од годината. Статистиката покажува и дека најмалку незгоди има во февруари.
Така, ако во 2010 година од вкупно 4.013 несреќи со потешки последици 1.217 се поради брзо возење и неприспособена брзина. Во 2011 имало 4.196 незгоди, а пребрзото возење е причина кај 1.260.
Лани од 3.868 незгоди, 863 се поради пребрзо возење, покажуваат статистичките податоци.
Со цел подобрување на состојбите, надлежните со флаери и плакати кои ќе се дистрибуираат на граничните премини, патарините и бензински станици ќе работат за поголема безбедност во сообраќајот.
Ова се само дел од предвидените активности за интензивирање на летната кампања 2013 што ја спроведува Републичкиот совет за безбедност на сообраќајот чија цел е подигнување на јавната свест, подобро информирање и предупредување на возачите.
„Oваа кампања, поделена во пет сегменти, има за цел да ја покрене јавната свест дека најголемиот причинител на трагични сообраќајни незгоди е човекот. Со почитување на правилата на безбедоност во сообраќајот, следење на патната сигнализација и прилагодување на брзината многу помалку луѓе ќе гинат на македонските патишта“, забележа Тоше Јанев, портпарол на РСБСП.