Левица: Општина Карпош ќе плати 2.4 милиони евра за експропријација на улица која не постои

Добивај вести на Viber

„Блокирана општинска сметка, милионски тужби и кратење наменски средства е епилогот од расипничкото владеење на Стевчо и неговото шурување со олигарсите!“, реагираат денеска со партиско соопштение од Левица.

„На последната седница на Советот на О. Карпош, беше поставена точка за итна пренамена на 16 милиони денари од буџетот за деблокада на општинска сметка и истата беше изгласана со мнозинство обезбедено од Градоначалникот.

Но, советничката група на Левица реагираше и бараше појаснување за потребата да се одвојуваат по 8 милиони денари во наредните 15 месеци за исплати по тужба од Свето "Пивара".
Имено, поранешниот сопственик на Скопска Пивара е исто така и земјопоседник во Карпош, односно неговата фирма Инвестмент Интернатионал е сопственик на празната парцела наспроти салата Борис Трајковски.

Откриваме, дека тој добива тужба против О. Карпош, која претходно сакајќи да избегне друга тужба од Пуцко Петрол за 15 миллони евра за поништување на ДУП со кој тој добиваше простор за бензинска пумпа, пренаменува дел од имотот на Свето за изградба на сервисна улица.

Иако улицата никогаш не беше изградена, а ДУП-от подоцна беше и поништен од Уставен Суд, Јаневски ќе добие над 132 милиони денари од Општината!“, нагласува Левица.

Ова, според Левица, донело дополнителни 16 милиони денари штета во камати и нотарски трошоци, бидејќи цела година била одолговлекувана исплатата.

„Залудни се манипулациите на Јакимовски, ДПМНЕ и СДС дека мора да гласаат и дека Општината е ставена пред свршен чин, бидејќи целиот проблем е создаден кога во 2016 токму Стевчо го создава спорниот ДУП за Пуцко Петрол, а подоцна повторно Богоев го донесува, шверцерски, на само месец пред крај на својот мандат.

Левица бара одговорност за расипничкиот однос на сите овие чинители со што се доведува во ризик функционирањето на општината и се крати од буџетот за градинки, уредување паркови, одржување на инфраструктура, за да се полнат џебовите на бизнис елитата со парите на граѓаните!“, велат од таму.