Мајданпек четврти ден без струја – министерот за вонредни ситуации не гледа зошто да оди во овој град

Добивај вести на Viber

Српскиот град Мајданпек веќе четврти ден е без струја и без греење, со што условите за живот во овој град стануваат неподносливи. Војската на Србија утрово таму однесе три агрегати со голема моќност, а работниците на српското Електростопанство работат непрекинато со цел да го отстранат големиот дефект на далекуводот заради кој во прекин е снабдувањето. Сепак, ова се уште не е причина за српскиот министер за вонредни ситуации Велимир Илиќ да го посети Мајданпек. Заради ова тој се соочува со многу критики во српската јавност. „Не можам да го поправам далекуводот, тоа нема врска со моите надлежности. Тоа се стручни работи и тука не можат да помогнат ниту војска, ниту полиција, затоа на терен е министерот за енергетика“, изјавил Илиќ. Градот синоќа на кратко доби струја, но веднаш потоа се случи нов дефект на далекуводот кој е окован во мраз. Никој не знае кога Мајданпек може да се надева на нормализирање на снабдувањето со електрична енергија. Во градот не работат училиштата и градинките, а болниците функционираат во вонредни услови на агрегати. Покрај струја, од понеделникот има прекини и во снабдувањето со вода и греењето.