МАКЕДОНЦИТЕ ПОТРОШИЛЕ 195 МИЛИОНИ ЕВРА ОНЛАЈН, најголем дел од трансакциите се кај домашни продавници

Добивај вести на Viber

Продолжува растот на вредноста и на бројот на трансакции направена со безготовински платежни трансакции на виртуелните места во првите шетст месеци годинава, покажуваат податоците на Народна Банка на Македонија.

Македонците потрошиле речиси 195 милиони евра во првите 6 месеци кон домашни онлајн продавници што претставува 70 отсто од вкупната вредност на направени онлајн трансакции. Во текот на првата половина од 2022 година, Македонците најмногу купуваат од домашните е-продавници, но темпото на пораст во однос на двете последни години е со помал интензитет. Поостварениот пораст од 169 отсто во првата половина од 2020 година и 83 проценти во 2021 година, во текот на првите шест месеци од 2022 година Македонците со домашни картички кон домашни е-продавници потрошиле речиси 195 милиони евра онлајн, што претставува пораст од 22 отсто во однос на истиот период претходната година, појаснуваат од Асоцијацијата за е-трговија на Македонија.

Бројот на трансакции кои што Македонците ги направиле кон домашните е-трговци изнесува 6,1 милион и претставува пораст од 15 отсто во однос на истиот период минатата година, па соодветно расте и вредноста на просечната трансакција која изнесува 32 евра и тоа кај физичките лица  – 30 евра, а кај правните субјекти – 37 евра.Со странски картички кон домашните е-трговци во првото полугодие од 2022 година реализирани се скоро 11 милиони евра односно 43 проценти повеќе отколку во истиот период минатата година, во 292 илјади трансакции. Просечната трансакција на странците кон домашните интернет продавници изнесува 37.7 евра. 

-  Не е обесхрабрувачки што порастот е значително помал споредено со претходните две години. Позитивно е што во структурата со 70 отсто и понатаму доминира вредноста со домашни картички кон домашни е-трговци. Растот и развојот на е-трговијата е во интерес на сите и во интерес на развој на домашната економија, а за да креираме соодветни политики и промени потребно е да носиме одлуки кои ќе бидат базирани на точни и квалитетни податоци – вели Нина Ангеловска, Претседателка на АЕТМ.

Македонците во странство направиле трансакции вредни 71 милиони евра во првите шест месеци од годинава што преставува 66 отсто раст во однос на минатата година. При тоа правните лица имаат поголем пораст во вредноста на направените онлајн трансакции или скоро 70 проценти во однос на претходната година. Со тоа се зголемува учеството на правните лица во вкупните трансакции на скоро 32 отсто. Бројот на направените трансакции од Македонци во странство изнесува 1,7 милион и расте со 31 проценти во однос на истиот период лани. Просечната трансакција изнесува 40.1 евра, и тоа 31.3 евра кај физичките лица и 118.3 евра кај правните лица.

Во првото полугодие од 2022 година вкупната вредност на онлајн трансакциите реализирани во земјата од Македонци и странци и во странство од македонци, изнесува скоро 277 милиони евра, што претставува пораст од 31.7проценти во однос на истиот период минатата година.