Македонија денеска го започнува скринингот за поглавјето 24

Добивај вести на Viber

Организираниот криминал и корупција во Македонија од денеска ќе се „скенира“ од ЕУ во Брисел, каде што нашата земја го започнува подготвителниот скрининг за Поглавјето 24 насловен „Правда, слобода и безбедност“.

Состанокот ќе трае три дена, за време на кои експертските тимови ќе ги чешлаат седумдесетте страници од европското законодавство (acquis communautaire/аки) посветен на овие теми. Дипломатски извори за МИА објаснуваат дека станува збор за обемна област, во која се дискутираат низа различни теми, како азил, миграција, и низа граѓански и кривични материи.

-Техничкото објаснување на аки-то за поглавјето 24 ќе се одржи од 12 до 14 ноември во Брисел за да ги запознае земјите со законодавството и стандардите на ЕУ во овие области, изјави за МИА портпаролката Маја Коцијанчич.

Таа потсетува дека Европската Комисија ја започна потребна подготвителна работа и “ќе продолжи да ја поддржува Поранешната југословенска република Македонија во нејзините напори да постигне опипливи и одржливи резултати посебно во борбата против корупцијата и организираниот криминал, области кои имаат важен импакт врз животите на граѓаните“, рече Коцијанчич.

До крајот на оваа година треба да се одржат ушти три скрининг состаноци за поглавјата 3 (слобода на услуги), 5 (јавни набавки) и 32 (финансиска контрола).

Вицепремиерот Бујар Османи ќе го претстави Планот 18 со кој стартуваат суштинските реформи потребни за интеграција на Македонија во ЕУ. 

- Фокусирани сме на четири поглавја, тоа се – правосудство, безбедносни служби, администрација и борба против организиран криминал и корупција. Тоа што е различно квалитативно во однос на Планот 3-6-9 се два моменти, односно две колони коишто се додадени на планот. Првото се таканаречените индикатори за реализација, односно врз основа на што ние ќе процениме дека е успешна реализацијата на мерките коишто се донесени во планот, но исто така многу важна, исклучително важна колона е таканареченото следење, односно што конкретно се сменило во секојдневното живеење за граѓаните од донесување на тие мерки. Дали во судовите има различен однос кон граѓаните? Дали јавната администрација е деполитизирана? Дали безбедносните служби се деполитизирани, се ефикасни или дали има конкретни резултати во борбата против организираниот криминал и корупцијата? И мислам дека со тоа додаваме додатна вредност. Тоа е важно за нашите граѓаните, затоа што пред сè реформите ги правиме заради нив. Тоа се барања на ЕУ, но користа од тие реформи ќе ја имаат граѓаните, но и да ги убедиме земјите членки дека покрај тоа што носиме закони, ние всушност имаме конкретни резултати. Притоа ние не се амбицираме дека од утре Македонија ќе ја направиме европска, туку ако секој нареден ден ни е подобар од претходниот, во смисла на конкретни резултати, ние имаме добар тренд на трансформација на државата и оттука го сметам Планот 18 за суштински да ни обезбеди датум во јуни - изјави Османи во разговор за Радио Слободна Европа.

Македонската делегација во Брисел ја предводи вицепремиерот за европски прашања Бујар Османи, во својство на главен преговарач  и шеф на државната делегација за преговори со ЕУ.

Како што информираат од кабинетот на вицепремиерот, за време на посетата, Османи ќе одржи и неформален брифинг со претставници на Работната група при Советот на ЕУ за Западен Балкан (КОВЕБ), каде ќе биде претставен и Планот 18, а ќе оствари и работна седба со еврокомесарот за проширување и соседска политика, Јоханес Хан