Македонија издаде еврообврзница – се задолжи половина милијарда евра!

Добивај вести на Viber

Македонија издаде еврообврзница со која се задолжи со 500 милиони евра, објави Министерството за финансии попладнево. Каматната стапка за враќање на позајмените средства ќе биде 3,97 проценти на годишно ниво со рок на отплата од 7 години. Од Министерството информираат дека на меѓународниот пазар имало голем интерес за македонските еврообврзници, но не се прецизира од каде се обезбедени позајмените половина милијарда евра. „Побарувачката од инвеститорите за македонската обврзница беше во износ од 1.160 милиони евра, односно двојно повисока од понудата. Тоа овозможи да се постигне стапка на принос од 4,25%, односно каматна стапка од 3,97% на годишно ниво. Тоа е историски најниска каматна стапка по која Македонија има издадено обврзница на меѓународниот пазар на капитал“, се додава во соопштението од ресорното Министерство. Владата денеска побара од медиумите да не се објавуваат детали и „инсајдерски информации“ околу износот на еврообврзницата, иако тој бил усвоен на владина седница уште минатата недела. Според премиерот Груевски, на Владата во овој момент не и било неопходно задолжување, но биле искористени поволните услови на пазарот, а парите ќе се трошеле главно за покривање на стари доспеани обврски догодина. Спооред Министерството за финансии, пак, целта на издавањето на еврообврзницата ќе биде „финансирање на буџетските потреби за оваа и за следната година, како и исплата на достасани обврски и обврски кои ќе стасаат во наредниот период“. Ова беше третата еврообврзница што ја понуди Македонија, но со најголем износ на позајмени пари досега. Првата со камата од 4.6% беше издадена во 2005-та кога министер за финансии беше Никола Поповски. Овие 150 милиони евра за враќање доспеваат догодина, за што делумно ќе бидат потрошени и сега земените пари. Втората со камата од 9.8% беше понудена во 2009-та, во времето на Трајко Славески, а 175-те милиони евра беа вратени лани во јануари.