МАКЕДОНИЈА СЕ „ДОКАМЧИ“ ДО 550 МИЛИОНИ ЕВРА, задолжувањето кај ММФ и Светска банка го помина собранискиот филтер

Добивај вести на Viber

Заемите од Меѓународниот монетарен фонд и од Светска банка го поминаа собранискиот филтер, и наскоро средствата кои овие институции ни ги страваат на располагање ќе може и да се користат. 

На денешната седница во Собранието по скратена постапка изгласани се предлог-законите за задолжување на Македонија кај Меѓународниот монетарен фонд (ММФ) со кредитна линија за претпазливост и ликвидност. Воедно пратениците го изгласаа и задолжување кај Меѓународната банка за обнова и развој – Светска банка по Договорот за заем за финансирање на Проектот за градење на ефективни, транспарентни и отчетни институции за управување со јавните финансии.

На јавноста веќе и е познато дека од ММФ побаруваме 530 милиони евра. 

Од податоците кои се објавени во предлог законот за за задолжување кај Меѓународната банка за обнова и развој – Светска банка може да се види дека вкупната вредност на проектот изнесува 24,9 милиони евра, од кои заем од Светска банка во износ од 20 милиони евра и 4,9 милиони евра грант од ЕУ кој ќе се администрира преку Светска банка. Проектот ќе се имплементира преку Единица за управување со проектот, која ќе биде формирана во Министерството за финансии. 

Координаторот на пратеничката група на ВМРО-ДПМНЕ Никола Мицевски во процедурална забелешка истакна дека „лошите економски перформанси на Владата ги гледаат меѓународните финансиски институции и банките и затоа задолжувањето со еврообврзница ќе биде исклучително скапо и со камата од осум проценти“.

- Овие денешни закони доаѓаат во една многу лоша економска состојба, која е аларманта. Јавниот долг од 2017 година е зголемен за три милијарди евра, односно за 600 милиони евра годишно. Принципиелно сме против задолжувањето што само вие знаете да го направите, без одредени мерки и визија за продолжување натаму, зашто цената на крајот ќе ја платат граѓаните, а може да се доведе во ризик и обезбедувањето пензија, исплата на плати, студентскиот стандард и сите реакции на граѓаните, истакна Мицевски.

Тој нагласи дека со цел да докажат дека не се кочничари на законите во Собрание, пратениците на ВМРО-ДПМНЕ ќе бидат за носењето на овие Предлог-закони, зашто, како што рече, ММФ и Светската банка „ќе го контролираат трошењето на јавните пари и нема да дозволат Владата да краде како до сега“.

Заменик министерот за финансии Филип Николоски на седницата образложи зошто Владата бара овие закони да бидат донесени по скратена постапка.

Пратеникот на ВМРО-ДПМНЕ, Јован Јаулевски побара дневниот ред на седницата да биде дополнет со точка Предлог-законот за субвенциониран студентски оброк, што од страна на претседателот на Собранието Талат Џафери беше одбиено, со образложение дека таа точка е ставена на дневен ред на заседанието што ќе се одржи на 16-ти ноември.

– Апелирам доколку се грижите за студентите да го поддржите решението на ВМРО-ДПМНЕ и пратеничката група и оваа сага конечно да се надмине. Денешниот протест на студентите пред Собранието го оправдувам и поддржувам, бидејќи барањата на студентите се скромни. Апелирам, не мора тоа да се поени на ВМРО-ДПМНЕ, ако сакате и вие потпишете се на тој закон, нека биде заеднички, бидејќи студентите се иднината на Република Македонија, рече Јаулески.