Македонски Телеком ја распредели дивидендата

Добивај вести на Viber

Вкупно околу 44,2 милиони евра дивиденда ќе исплатат Македонски Телеком и Т-Мобиле Македонија за 2013 година, одлучи Годишното акционерско собрание на компаниите. Бруто износот на дивиденда по акција е 31,49 денари во кој е вклучен данокот на добивка, персонален данок на доход и данокот по задршка, каде што е применливо, објавија од компанијата.Оваа добивка е помала од претходните години - лани беше поделена дивиденда од 65 милиони евра, а во 2012 година - повеќе од 71 милион евра. Согласно овие пресметки во државната каса годинава ќе се слеат 15,3 милиони евра од дивиденда на телекомуникацискиот оператор, со оглед на тоа што и државата е еден од акционерите во Телекомот и поседува удел од 34,81% во компанијата. Според најавите, исплатата ќе се врши во текот на последната недела на април. Собранието го одобри и работењето на членовите на Одборот на директори на Македонски Телеком за 2013, a го усвои и Годишниот извештај за работењето на Секторот за интерна ревизија за 2013 година. Собранието на Т-Мобиле Македонија и Собранието на Македонски Телеком на својата денешна седница ја констатираа оставката на Јанош Сабо и Михај Немет од позицијата неизвршни членови на Одборите на директори и го разрешија Тамош Вагани од позицијата независен неизвршен член на Одборите на директори, почнувајќи од 1 април, 2014 година. За нови неизвршни членови на Одборите на директори на двете Друштва се избрани: Атила Кесег и Михаел Франк, а за нов независен незивршен член на Одборите на директори е избран Франк Полц, сите со мандат од четири години, почнувајќи од 1 април, 2014 година.