Добивај вести на Viber
Депозитите пораснале за 87,5 милиони евра лани во споредба со 2014 година. Тоа е раст од 3,5 отсто и тоа во услови кога паѓаа каматните стапки. Македонците најмногу пари чуваат во „Комерцијална банка“ – една милијарда евра
Македонските граѓани чуваат 155,2 милијарди денари (2,5 милијарди евра) во трите најголеми банки во земјава: НЛБ , „Комерцијална банка“ и во „Стопанска банка Скопје“, на крајот на 2015 година, покажуваат податоците од годишните извештаи на трите најголеми банки кои држат околу 60 отсто од македонскиот банкарски пазар. Од податоците видно е дека депозитите на граѓаните лани во однос на 2014 година се зголемени за 5,4 милијарди денари (87,5 милиони евра) што претставува раст од 3,5 отсто. Овој раст се случува во услови на дестимулативни каматни стапки за штедење кои во зависност од рокот на штедење и од валутата варираат од 0,3 до 3 отсто.
Од официјалните податоци на две од трите големи банки е видливо дека граѓаните се одлучуваат на различни видови на штедење и дека во различни банки, во зависност од нивната деловна политика, пополуарни се депозити по видување или орочени депозити. Соодносот на штедење во денари или во странска валута е речиси изедначен со тоа што блага предност има штедењето во денари и тоа е веројатно заради попримамливи каматни стапки кои банките ги даваат за депозити во нашата национална валута.
Македонците најмногу чуваат во „Комерцијална банка“, а најмногу пораснала довербата во НЛБ
Податоците од годишните извештаи покажуваат дека граѓаните најмногу пари чуваат во „Комерцијална банка“ и тоа 61,3 милијарди денари. Таа банка лани во споредба со 2014 година има раст на депозити на граѓани во износ од 2,4 милијарди денари. Најголем процентуален и апсолутен раст на депозитите има НЛБ. На крајот на 2015 година кај неа се депонирани 41,1 милијарди денари што претставува раст од 7 отсто односно 2,7 милијарди денари во однос на крајот на 2014 година.
„Стопанска банка Скопје“ е на второ место на листата. Таму домаќинствата чуваат 52,8 милијарди денари (856,1 милиони евра) на крајот на 2015 година. Во споредба со 2014 година кога нивото било 52,5 милијарди денари (851,5 милиони евра) растот е 4,6 милиони евра односно 0,5 отсто.