Мицкоски прифаќа средба со Ковачевски, ама прво да заврши со предавањето
Објавено во: Македонија 30 Ноември, 2023
За лидеорт на ВМРО-ДПМНЕ, Христијан Мицкоски, е прифатлива поканата на премиерот Димитар Ковачевски за лидерска средба в понеделник, но таа да се одржи по 11 часот кога ќе заврши неговото предавање пред студентите на Машинскиот факултет.
- Од медиумите дознавме дека премиерот Ковачевски закажува лидерска средба за понеделник поврзана со изборите. Таквата комуникација преку медиуми за вака важни прашања е негов избор. Лидерска средба е секако прифатлива за во понеделник, на која очекуваме да се разговара конечно за прецизирање на датум за избори, прифаќање на забелешките на ОБСЕ/ОДИХР, како и понудата за укинување на техничка влада, во замена за тоа да нема технички оремиер од ДУИ. Воедно бидејќи се одлучи за комуникација преку медиуми, замолуваме средбата да биде после 11 часот во понеделник бидејќи претседателот на ВМРО ДПМНЕ има часови со студенти на Машинскиот факултет каде работи како редовен професор – брифираат од ВМРО-ДПМНЕ.
Премиерот Димитар Ковачевски закажа лидерска средба за понеделник. Тој синоќа изјави дека лидерската средба за договор за изборите ќе се одржи во понеделник на која треба да учествуваат сите парламентарни партии и собранискиот спикер Талат Џафери.
„На лидерската средба ќе разговараме за евроинтегративниот процес на земјата, за одржувањето на редовните парламентарни и претседателски избори но и за измените на Изборниот законик согласно препораките на ОБСЕ/ОДИХР“, рече Ковачевски. На синоќешната заедничка прес конференција со еврокомесарот за надворешни работи и безбедносна политика, Жозеп Борел, премиерот Ковачевски најави дека денес ќе испрати покана до сите парламентарни партии и до претседателот на Собранието, Талат Џафери, во понеделник да одржат лидерска средба. ВМРО-ДПМНЕ претходно бараше избори.