Миксетата 115 илјади евра, шанкот 70 илјади, најскапиот микрофон милион денари во Национална филхармонија

Добивај вести на Viber

Министерството за култура му го пренесе правото на трајно користење на опремата и инвентарот во надлежност на Националната филхармонија - Скопје, а во списокот на евиденција кој го погледна „Фактор“ може да се види колку чини поединечно се што е набавено своевремено пред отворањето на објектот во 2017 кој чинеше помеѓу 30 и 40 милиони евра. 

За 108-те плакари во кои 109 музичари можат да ја чуваат својата гардероба и инструмент чинат 25,37 милиони денари, или 233 илјади еден. Полиците каде што се чуваат нотите вкупно чинат 14 милиони денари, а ги има 22. Еден статив за транспорт на инструментите чини 121 илјада, а сите три заедно 365 илјади денари. За двете подвижни оркестарски платформи платено е осум милиони денари. Фолио и комоди за чување ноти ги има десет во записникот, а платени за нив биле 2,3 милиони денари.

Купените четири ЛЦД-монитори се по цена од 324 илјади денари, а 12-те сетови од предаватели и приемници на дигитално видео чинеле по 133,3 илјади денари еден. Најскапиот микрофон е милион денари, а ги има два такви меѓу многуте други

Дигиталната аудио миксета за удио-мониторинг на сцена чини 7 милиони денари, или околу 115 илјади евра. За шанкот во кафе-барот од 21 метар квадратен е издвоено од државниот буџет 4,3 милиони денари, или околу 70 илјади евра. Од петте пултови, најскапиот е 13,5 метри квадратни и вредел 2,8 милиони денари, односно повеќе од 45 илјади евра.

Преклопните фиксни седишта за малата сала чинеле 85 илјади парче а ги има 112 такви, а не се многу поевтини ниту другите кои биле платени од 70 до 80 илјади денари. Најскапите музички столици за диригентот, пијанистот, за дувачките и гудачките инструменти чинат по 78 илјади денари една. Сите седишта заедно наменети за публиката чинат повеќе од милион и пол евра.

За секој од 14-те звучници е платено по 230 илјади денари, а набавувани се и трансмитери, слушалки, аудио-кабли меѓу кои најскапите два чинат по 95 илјади. Набавени се и држачи за инструменти, подиуми за солисти, акустични штитови, светла,  Купувани се и многу други плакари, кујнски елементи, ормари за гардероба на публиката, фиокари, бар-столови, работни маси итн. 

Од склучениот договор помеѓу министерот за култура и директорот на националната установа може грубо да се пресмета дека се работи за повеќе од 4 милиони евра платени за оваа опрема и инвентар.

Филхармонијата во 2017 доби свој простор после 73 години постоење, откако со децении ја користеше салата на Домот на АРМ, а изминативе години филхармоничарите свиреа и во МОБ и во Македонскиот народен театар (МНТ).

А.К.