МОДЕРНИ МАКЕДОНЦИ: Сѐ помалку вадат готовина за плаќање, мобилните сѐ повеќе влегуваат во игра

Добивај вести на Viber

Граѓаните се повеќе сакаат да ги користат модерните начини за плаќање, како што се кредитните и дебитните картички, но во последно време се повеќе во употреба се и мобилните апликации, или таканаречените платни налози. 

Имено, и во третиот квартал од 2023 година се бележи нагорен тренд во употребата на дигиталните канали за извршување на плаќањата во земјата, особено од граѓаните, како на платежните картички, така и на мобилните апликации за електронско иницирање на кредитните трансфери, т.н. платни налози, информираше Народната банка, која ги објави податоците од доменот на платежната статистика за третиот квартал од 2023 година.

„Годишниот раст на употребата на платежните картички издадени во земјата за готовински трансакции и за плаќање производи и услуги во земјата од страна на граѓаните во третиот квартал од оваа година, во споредба со истиот период минатата година, изнесува 12,8 отсто кај бројот и 10 отсто кај вредноста на овие трансакции. Притоа, значителен годишен раст од 15,1 отсто е забележан кај употребата на картичките за плаќање производи и услуги во земјата, којшто пред сѐ се должи на посилниот раст на плаќањата на физичките места на продажба од 15,9 отсто, но и солиден раст од 9 отсто на плаќањата на виртуелните (интернет) продажни места“, се вели во соопштението од НБМ.

Плаќањата на граѓаните со кредитни трансфери (т.н. платни налози) во истиот период забележаа годишен раст од 9,3 отсто кај вредноста и 5 проценти кај бројот на остварените трансакции, при натамошна зголемена употреба на електронското банкарство за иницирање на овие плаќања. 

Имено, бројот на електронски иницираните платни налози во третиот квартал од 2023 година забележа годишен раст од 16,1 отсто, што е повеќе за 10,8 п.п. од годишниот раст во третиот квартал од 2022 година (5,3 отсто). Во споредба со истиот период од 2022 година, се забележува позитивен нагорен тренд особено кај употребата на апликациите на мобилните телефони, или годишен раст од 19,5 отсто, како и кај употребата на компјутерите за извршување на плаќањата (11,8 проценти). 

Податоците од доменот на платежната статистика за третиот квартал од 2023 година, коишто покрај изнесените податоци за платежните трансакции на граѓаните во земјата, содржат и податоци за платежните трансакции на правните лица во земјата, се достапни на следнава врска.