MOРАМЕ СО СЕТА СИЛА ДА ЈА СКРШИМЕ ГАЗА: Израелски министер се закани со уништување на Хамас

Мораме со сета сила да ја скршиме Газа, без компромис, без договор, вели израелскиот министер за национална безбедност Итамар Бен Гвир.

„За доброто на децата кои сè уште не се вратени, за убиените кои нема да се вратат, за спречување на повторување на ужасите од октомври – мораме да се вратиме и со сета сила да ја скршиме Газа, да го уништиме Хамас и да се вратиме во Појасот. Без компромиси, без договори, со максимална сила“, кажа министерот. 

Израел за прекинот на примирјето го обвини Хамас, наведувајќи дека не се придржувал до договорот, додека палестинската организација ја префрли одговорноста на Западот. Владиниот кабинет за медиуми во Газа, под контрола на Хамас, ги обвини Соединетите Американски Држави и меѓународната заедница за продолжувањето на борбите во Газа.

Министерството информира дека САД и меѓународната заедница „ја сносат одговорноста за злосторствата на израелската окупација и продолжувањето на бруталната војна против цивилите, децата и жените во Газа“. Во соопштението се наведува дека Палестинците имаат право да се бранат со сите средства и да воспостават палестинска држава со Ерусалим како главен град.

Американскиот весник „Њујорк Тајмс“ денеска објави дека израелските власти добиле разузнавачки информации за борбениот план на Хамас за нападот на 7 октомври повеќе од една година пред тој да се случи.

Масакрот на Хамас на 7 октомври беше „само проба“, се закани во четвртокот водачот на исламистичката група од Газа, Јахја Синвар.

foto EPA