На аеродромот „Александар Велики“ повеќе од 600 илјади патници и раст од близу 14%
Објавено во: Економија 30 Јули, 2015
Аеродромот „Александар Велики“ во Скопје го заврши првото полугодие од 2015 година со опслужени 608.721 патник и забележа раст од 13,8% во споредба со истиот период минатата година. Унгарскиот ниско-буџетен авиопревозник„Wizz Air“ и понатаму е неспорен лидер на аеродромот со учество од 50% во бројот на превезени патници. Компанијата отвори 5 нови летови, го зголеми сообраќајот на неколку од постоечките линии и порасна со импресивни 20% во првите шест месеци од 2015 година. На второто место се најде „Turkish Airlines“ којшто го надмина „Austrian Airlines“ како прв избор за поврзани летови и порасна за солидни 8,2% во првото полугодие. „Pegasus Airlines“ забележа висок раст од 15,6% и се искачи на четвртото место, додека бројот на патници на националните авиопревозници од поранешна Југославија во голема мерка остана непроменет, пренесува portline.mk.
Истанбул го задржа првото место меѓу најатрактивните дестинации за летање, Цирих на второто, па следи Виена, Малме и Лондон на петтото место. Македонија на 59-то место во светот според аеродромската инфраструктура Светскиот Економски Форум го објави својот реномиран двегодишен извештај за конкурентност во патувањето и туризмот, во којшто се мери и рангира конкурентноста на 141 национална економија, според четиринаесет различни категории, меѓу кои и воздушниот сообраќај. Во извештајот од 2015 година, Македонија е прогласена како земја со најдобра аеродромска инфраструктура меѓу земјите од поранешна Југославија, со забелешка дека Босна и Херцеговина и Косово не се вклучени во извештајот. Две третини од податоците се обезбедени од меѓународни организации, а последната третина се базира на годишна анкета на преку 15.000 менаџери на компании и бизнис лидери во сите земји кои се дел од оценувањето. Анкетата нуди уникатен увид во критичните точки на конкурентноста во патувањето и туризмот. Македонија го зазеде 59тото место во светот според аеродромската инфраструктура, со просечна оценка од 4.7 (со оценки 1- најниска до 7 највисока), следена од Словенија на 67-то место, Црна Гора на 74-то и Хрватска на 76-то место. Србија заостанува во рангирањето и го зазеде 111то место. Сингапур ја има најдобрата аеродромска инфраструктура во светот, додека Обединетите Арапски Емирати и Хонг Конг го зазедоа второто и третото место. Скопскиот аеродром неодамна беше прогласен и за деветти најдобар аеродром во Источна Европа во глобалната анкета на патници од страна на „Skytrax“. Исто така, во 2013 и 2014 аеродромот беше прогласен за најдобар во Европа во категоријата до два милиони патници од страна на Светскиот Аеродромски Совет (Airports Council International - ACI). Со својот нов терминал со шест мостови и капацитет да опслужи четири милиони патници годишно, скопскиот аеродром во континуитет бележи двоцифрени стапки на раст во последните неколку години. Директен лет Скопје-Будимпешта до крајот на 2015 Македонија и Унгарија планираат да воспостават редовна линија помеѓу главните градови до крајот на 2015 година, три години откако беше забележан последниот лет помеѓу овие две земји. По преговорите во Скопје, Унграскиот министер за економска дипломатија, Левенте Маѓар, изјави дека се планира оваа година да започнат директни летови помеѓу Будимпешта и главниот град на Македонија, со оглед на тоа дека во моментов патувањето помеѓу градовите трае околу седум до осум часа. Директен лет би го скратил времетраењето на патувањето на помалку од девеесет минути и би помогнал во развојот на економските и туристичките врски помеѓу двете земји. Според владини извори, Унгарскиот „Wizz Air“, којшто има развиена мрежа и има своја база во Скопје е авиокомпанијата која најверојатно ќе лета и на оваа линија.