„НА ЕВРОПА И ТРЕБААТ ПОСИЛНИ БАНКИ“: Шефицата на ЕЦБ вели спојувањето на Уникредит и Комерцбанк е тест

Добивај вести на Viber

На Европа и требаат поголеми и посилни банки кои ќе можат да се натпреваруваат со американската и кинеската конкуренција, рече претседателката на Европската централна банка (ЕЦБ) Кристин Лагард. Таа се согласи со шефот на италијанската Уникредит и неговата молба за консолидација во подготовката на теренот за евентуално преземање на германската Комерцбанк.

Италијанската Уникредит, која е сопственикот и на Загребачка банка размислува за спојување со германскиот заемодавател, во кој на почетокот на септември купи девет отсто од акциите, вклучувајќи пакет акции во сопственост на германската влада и акции купени на берзата.

Тие потоа известија дека користеле финансиски инструменти за да го подготват теренот за зголемување на уделот до 21 отсто, под услов да добијат зелено светло од Европската централна банка (ЕЦБ). Тие додадоа дека побарале дозвола последователно да го зголемат удделот на 29,99 проценти.

Потезите на италијанската банка кренаа прашина во германските политички кругови и во администрацијата на Комерцбанк, но и синдикатите се кренаа на нозе.

Извршниот директор на УниКредит минатата недела на конференција во Лондон рече дека сите опции се отворени за нив, вклучително и спојување. За Уникредит, Комерцбанк е само инвестиција, но можеме да се здружиме и да направиме нешто поголемо, рече Орцел.

- На Европа и требаат поголеми банки и спојувањето на Уникредит и Комерцбанк би било тест - рече шефот на италијанскиот кредитор.

Претседателката на ЕЦБ се согласи со неговото мислење на сослушувањето во комисијата на Европскиот парламент.

- Според мое мислење, прекуграничните спојувања се пожелни, банките кои можат вистински да се натпреваруваат со другите институции ширум светот, вклучително и американските и кинеските банки, во однос на длабочината и опсегот (на деловното работење) се пожелни - рече Лагард.

Консолидацијата на банките е во интерес на Европа, рече првиот човек на ЕЦБ, а прекуграничните спојувања имаат многу предности, доколку произведат поголеми, поагилни и посилни институции.

Сепак, таа се огради со напомена дека нејзините изјави не треба да се сфатат како директна интервенција во конкретен договор и посочи дека спојувањата носат одредени ризици за кои треба да одлучува приватниот сектор.

Конечната одлука за поврзувањето ќе ја донесе Управниот совет на ЕЦБ

Комерцбанк е системски важна банка, така што нејзин супервизор е ЕЦБ, чиј надзорен одбор ќе одлучува за барањето на Уникредит да купи 21 отсто од акциите на германскиот заемодавач.

Нејзините членови обично се фокусираат на елементи на управување со ризик, како што се капиталот, ликвидноста, деловните планови и управувањето, при обработката на апликациите.

Уникредит побара и зелено светло за зголемување на својот удел на 29,99 проценти. Група од шест претставници на ЕЦБ минатата недела изјавија за Ројтерс дека начелно го поддржуваат спојувањето на двете банки, додавајќи дека отпорот на Берлин, според нив, е во спротивност со принципот на европската интеграција.

Конечната одлука за поврзувањето ќе ја донесе Управниот совет на ЕЦБ на чело со претседателката Кристин Лагард.

Фото: Принтскрин/Твитер