Добивај вести на Viber
Јавниот долг на централната Влада достигна 40, 8 проценти од БДП. Министерството за финанси ги објави последните јулски податоци за состојбата на долгот, кои покажуваат дека долгот на централна Влада изнесува 3 милијарди 303 милиони евра.
Раст има и во внатрешните и во надворешните задолжувања. Во компарација со вториот квартал, во месецот јули надворешниот долг е зголемен за 505 милиони евра, односно за издадената еврообврзница. Внатрешпниот долг има мал пораст од 6 милиони евра.
Инаку ММФ неодамна пресмета дека вкупниот јавен долг на Македонија изнесува 44,8% од БДП. Сепак, во оваа пресметка не влегува најновото задолжување на државата со половина милијарда евра преку еврообврзница.
Доколку се додадат и овие пари, долгот на државата, во кој освен долгот на Владата влегуваат и долговите на Народната банка, Македонската банка за обнова и развој, општините и нефинансиските претпријатија, надминува 51% од БДП или над четири милијарди евра, покажаа податоците на ММФ.
Власта и опозицијата минатиот месец жестоко се судрија за и околу висината на јавниот долг.
„Ги повикуваме Ставрески и Груевски да не манипулираат туку да им соопштат на граѓаните во Македонија колку е сериозна ситуацијата со задолженоста на државата“ изјавија од СДСМ.
Според владејачката партија, пак, парите се позајмуваат за инфраструктурни проекти.
„Велите многу сме се задолжувале, но не кажувате за што. Земавме 505 милиони долари за изградба на автопатот Кичево – Охрид, земавме 278 милиони евра за изградба на автопатот Миладиновци – Штип, земавме 220 милиони евра за автопатот Демир Капија – Смоквица, земавме 160 милиони евра за рехабилитација на патишта, земавме 50 милиони евра за локални патишта, земавме средства за рехабилитација и на државните патишта“, стоеше во соопштението од ВМРО ДПМНЕ.