Намалени државните резерви – дали парите отишле за изборни трошења?

Добивај вести на Viber

За еден месец, од февруари до март, државните резерви се намалиле за 46 милиони евра. Според последните податоци на Народната банка, државните резерви во март изнесувале 1.942.200.000 евра, а споредено со последниот квартал од минатата година, резервите во првите три месеци од годинава се намалиле за 52 милиони евра. Од централната банка, ваквото топење на државните резерви го објаснуваат со „сезонски фактори“, без точно да појаснат за какви фактори станува збор. Велат дека намалувањето е целосно во согласност со проекциите на НБРМ, Намалувањето на девизните резерви во најголем дел се должи на намалувањето на девизните резерви во валути и депозити. Тие на крајот на 2013 изнесувале 171,7 милиони евра, а на крајот на март годинава само 121,5 милиони евра. Има пад и кај износот на хартии од вредност - од 1,627 милијарди евра на крајот на минатата година на 1,610 милијарди евра на крајот на првиот квартал годинава. За опозицијата, ваквиот пад е резултат на предизборните трошења. „Многу јасно е дека за да ги покрие своите огроми предизборни буџетски трошења власта зафатила и од девизните резерви. За помалку од 3 месеци,од предизборниот извештај се гледа дека дефицитот достигнал колку цела 2012 или 2011 година.За да се изреализира толкаво трошење во период кога нема приливи од фирмите,очигледно покрај редовното создавање долгови е зафатено во резервите“, вели Ванчо Узунов, потпретседател на СДСМ. Во март се намалила и вредноста на монетарното злато во државните резерви - на крајот на март тоа вредело 205,2 милиони евра, а месец претходно - 212,1 милиони евра.