Нападнати ученици во автобуси - Се повторуваат ли црните сценарија?

Добивај вести на Viber

Во последните неколку денови расте бројот на пресметки меѓу најмладите кои потсетуваат на бројните тепачки кои се случуваа пред неколку години, а како главна арена се автобусите. 

Вчера две момчиња од Скопје се физички нападнати во автобуси на Јавното сообраќајно претпријатие.

Едното момче на возраст од 16 години било нападнато од неколку непознати лица вчера околу 13 часот во автобус бр. 50 на автобуската постојка кај АСУЦ во населбата Автокоманда. Случајот во полиција го пријавила неговата мајка.

Истиот ден во 13:10 часот во полициската станица во Гази Баба, 18-годишниот пријавил дека околу 12:30 часот во автобус на ЈСП со бр.68, кој се движел на релација од кино „Маџари“ до „АСУЦ“, без повод и причина бил физички нападнат од страна на седум–осум непознати лица.

Тензиите се високи со продлабочувањето на политичката криза, па се испраќаат апели од сите страни кон младите да не подлегнуваат на провокации и да се избегнат црните сценарија во кои тие би биле жртви на меѓусебни пресметки или пак на напади без никаков повод и причина.

Се преземаат мерки за пронаоѓање на напаѓачите и за целосно расчистување на случаите.