НАУМ, ХАНА И ХРИСТИЈАН СЕ ПРВИТЕ БЕБИЊА ВО СКОПЈЕ ВО 2016 ГОДИНА

Добивај вести на Viber

Градоначалникот на Град Скопје, Коце Трајановски и Mинистерот за здравство, Никола Тодоров денеска /01.01.2016 година, петок/ на Клиниката за гинекологија и акушерство при Универзитетскиот клинички центар ги посетија првите бебиња што се родија во Скопје во Новата 2016 година.

Првите бебиња во 2016 година се родени во 00:01 минута по полноќ. Едното е машко бебе и се вика Наум, тешко е 3 килограми и 700 грама, а долго 52 сантиметри, од мајката Јована Андоновска Буриловска, на која ова и е трето дете. Другите две бебиња се близнаци, машко и женско, од мајката Александра Андонова, на која ова и се први деца. Женското бебе се вика Хана, тешко е 2 килограми и 290 грама, а долго е 47 сантиметри, а машкото бебе се вика Христијан и е тешко 2 килограми и 250 грама, а долго е 48 сантиметри.

- Со задоволство им честититам на мајките и на семејствата на новороденчињата и им посакувам среќни новогодишни и божиќни празници, а на бебињата им посакувам многу здравје. Трите првородени бебиња значат дека ќе имаме бериќетна година. Во новата 2016 година посакувам да имаме повеќе новороденчиња отколку во 2015 година  - изјави Градоначалникот Трајановски.

Градот Скопје традиционално на првородените бебиња во новата година им подари три штедна книшки со по 20.000 денари и други пригодни подароци

Градоначалникот Трајановски ја искористи приликата да им ја честита Новата 2016 година на своите сограѓани и да им пожели добро здравје, среќа, љубов и успех.