НБРМ: Економијата закрепнува, инфлацијата се контролира, но ризиците остануваат

Добивај вести на Viber

Каматната стапка на благајничките записи да се задржи на нивото од 3,25 %, а на аукција да се понудат благајнички записи на ниво на износот што достасува, одлучи Комитетот за оперативна монетарна политика на Народната банка (НБРМ) на денешната седница. Оттаму не очекуваат поголеми промени во однос на амбиентот за водење на монетарната политика, а беше посочено дека остварувањата во реалниот сектор во првата половина од годината се подобри од очекуваните. Затоа се предвидува повисок економски раст за 2013 година, но и поради фактот што се очекува натамошна поддршка на растот преку странски и јавни инвестиции. Од НБРМ ќе ја задржат тековната монетарна поставеност, а посочија и дека иако ќе закрепнува економијата, нема да дојде до забрзување на инфлацијата. „Инфлациските изгледи за 2013 година не се променети во однос на април. И понатаму се очекува забавување на растот на инфлацијата во следните две години, во отсуство на шоковите од увозните цени, коишто ги имаше досега. Проекциите за надворешниот сектор упатуваат на помал дефицит во тековната сметка во однос на очекуваниот во текот на априлските проекции, при помали увозни притисоци и подобри извозни остварувања“, соопштија од банката. Сепак следните две години се очекува зголемување на дефицитот во тековната сметка, но проекциите, посочуваат од НБРМ, укажуваат на доволно капитални приливи за финансирање на дефицитот и зголемување на девизните резерви. „Во 2013 година кредитната поддршка на економијата е малку послаба од очекувањата, имајќи предвид дека банките се уште се воздржуваат од кредитирање, а оценето е дека има високи ризици во корпоративниот сектор и дека стратегиите на големите банкарски групации во македонскиот банкарски систем се конзервативни. Сепак, во следните две години се очекува забрзување на кредитниот раст, при претпоставки за солиден раст на депозитите, подобрување на квалитетот на кредитната побарувачка и на согледувањата за ризик на банките“, посочуваат од НБРМ. Велат дека постојат ризици за надворешната позиција на економијата, односно базичната инфлација и натаму е релативно висока што упатува на потреба од поголема претпазливост. Ликвидноста на македонскиот банкарски систем и во октомври е стабилна.