Добивај вести на Viber
На домашните финансиски пазари продолжува зголемената меѓубанкарска активност на пазарот на депозити, при релативно високо учество на реализираните меѓубанкарски трансакции со подолга рочност (од 7 дена до 1 месец) во вкупниот промет, соопштија денеска од Кабинетот на гувернерот на Народната банка на Македонија.
Од НБРМ посочија дека движењата на девизниот пазар се поволни и се карактеризираат со повисока понуда на девизи и зголемен откуп од страна на Народната банка, штобезбедува одржување на девизните резерви на соодветно ниво. Затоа, велат од НБРМ, девизниот курс на денарот се одржува на стабилно ниво.
Во месечното соопштение уште се додава дека подобрени се согледувањата на инвеститорите на меѓународните финансиски пазари, се очекува стабилизирање на европската економија кон крајот на 2012 година и умерен раст во 2013-та.
Сепак, глобалните економски изгледи сè уште се под влијание на неизвесноста во евро-зоната и послабото економско закрепнување во следниот период, во споредба со претходните очекувања - стои во соопштението.