НБРМ прогнозира зголемување на кредитната активност

Добивај вести на Viber

НБРМ очекува дека и поматаму ќе има економско закрепнување што ќе ја зајакне кредитната активност на банките насочена кон корпоративниот сектор. Во Извештајот за ризиците во банкарскиот систем на Република Македонија во третиот квартал, се посочува дека почетокот на закрепнувањето на реалниот сектор во 2013 година придонесува за раст на активата и на депозитното јадро на банките. „Карактеристично за третиот квартал е тоа што главен носител на растот на депозитите кај банките беше корпоративниот сектор, за разлика од претходните квартали кога тоа беа домаќинствата.Од друга страна, главен носител на растот на кредитирањето и натаму се домаќинствата, додека кредитите кон корпоративниот сектор бележат намалување“, се посочува во кварталниот извештај. Врз растот на кредитната активност,  според НБРМ ќе делуваат и мерките на монетарната политика преземени во претходниот период, како и дополнителната мерка за управување со ликвидносниот ризик. Од НБРМ укажуваат и дека внимателноста при кредитирањето се гледа и во тоа што, во третиот квартал, банките ги насочија половината од новите извори на средства во ликвидни инструменти, што, пак, од своја страна придонесе за натамошниот раст на ликвидната актива и зајакнувањето на ликвидната позиција на банкарскиот систем. Адекватноста на капиталот веќе подолг период е над 17%, што е далеку над законски пропишаниот минимум. „Во текот на првите девет месеци од 2013 година е забележано мало, но постојано подобрување во показателите за ефикасноста на банкарскиот систем, под влијание пред се на растот на нето каматниот приход и падот на оперативните трошоци. Оставарената добивка на банкарскиот систем во овој период е речиси двојно поголема од добивката остварена во истиот период од минатата година. Банкарскиот систем, во целина, ја задржа својата стабилност и отпорност на шокови. Очекувањата за понатамошните движења се оптимистички“, се додава во Извештајот.