Оптимистички проекции на НБРМ: БДП ќе расте – инфлацијата ќе се стабилизира

Добивај вести на Viber

Раст на бруто-домашниот производ за 3,3 отсто годнава, односно за 3,7 проценти во 2014 година. Ова се новите и оптимистички проекции на Народната банка. Оттаму прогнозираат дека растот на македонската економија во 2015 ќе достигне до 4,4 проценти, а како главни носители за ова ќе бидат извозниот сектор, инвестициите, но и очекуваното зголемено кредитирање. „Економскиот раст е ревидиран нагоре. Наместо 2,3 проценти, ревидираната стапка е 3,3 проценти. За наредната година очекуваме засилување и наместо 3,1 проценти растот да биде 3,7 проценти, а во 2015 година очекуваме посилен раст од 4,4 проценти“, рече гувернерот на Народната банка, Димитар Богов. Според последните прогнози, инфлацијата ќе се стабилизира на 2,3 отсто во 2014, но на ова ќе притискаат цените на храната, смета гувернерот Богов. Се најавува продлабочување на трговскиот дефицит. „НБРМ има доволно средства и води сметка за обврските кои доаѓаат во наредниот период’, истакна Богов кој вели дека сервисирањето на јавниот долг не треба да се доведе во прашање. Според него, треба да се намали домашното задолжување за покривање на буџетскиот дефицит и дека е подобро тој да се финансира од надворешно задолжување. Богов оптимизмот го темели на подобрите остварувања во првата половина од годинава, извозот од новите странски и јавни инвестиции, но и од придвижувањето на личната потрошувачка. За следната година се очекува странските директни инвестиции да изнесуваат 330 милиони евра или 4 проценти од БДП. Сепак, појаснуваат од НБРМ, ризиците однадвор се сеуште присутни па состојбите ќе зависат и од европските и светски трендови.