НЕ ГО ПОСЛУШАА ПРЕТСЕДАТЕЛОТ: Федералните резерви на САД ги задржаа постојните каматни стапки - петти пат по ред

Добивај вести на Viber

Федералните резерви на САД соопштија дека ги задржале каматните стапки на место по петти пат по ред, и покрај интензивниот притисок од претседателот Доналд Трамп и неговите сојузници за намалување на трошоците за задолжување.

Централната банка ја остави референтната каматна стапка во опсег од 4,25 до 4,5 проценти, што е исто од декември минатата година, објавува CNN.

Шефовите на Федералните резерви сакаат да почекаат уште малку за дополнителни податоци за да видат како американската економија ќе се справи со трговската војна на Трамп, и покрај тоа што се соочува со постојани напади од Белата куќа поради нејзината стратегија „чекај и види“.

Денешната одлука не беше едногласна и за прв пат од 1993 година, повеќе од еден гувернер беше против одлуката. Гувернерот на ФЕД, Кристофер Волер, и потпретседателката на ФЕД задолжена за надзор, Мишел Боуман, беа против тоа и побараа намалување на каматната стапка за четвртина процентен поен, објави ФЕД.

Претседателот на Федералните резерви, Џером Пауел, на прес-конференција изјави дека се уверени дека американската економија е доволно силна за да одржи стабилни стапки, бидејќи останува да се види како царините на крајот ќе влијаат на цените и како тие ќе влијаат на економијата.

„Повисоките царини почнаа појасно да влијаат врз цените на некои стоки, но нивните целокупни ефекти врз економската активност и инфлацијата сè уште не се видливи. Разумно е да се претпостави дека ефектите врз инфлацијата би можеле да бидат краткотрајни, одразувајќи еднократна промена на нивото на цените, но не е невозможно инфлаторните ефекти да бидат потрајни, а тоа е ризик што треба да се процени“, рече Пауел на прес-конференцијата.

Пауел истакна дека иако царинските политики на Трамп се обликуваат, останува уште многу да се разбере за нивните крајни ефекти, вклучително и дали тие ќе предизвикаат одржлива инфлација.