НЕМА ДА ЗАПРАТ: Хутите кажаа до кога ќе ги гаѓаат израелските бродови
Објавено во: Свет 15 Јануари, 2024
Хутите велат дека ќе продолжат да ги гаѓаат израелските бродови додека не престане агресијата во Газа.
Портпаролот на Хутите, Мухамед Абдулсалам рече дека ставот на јеменската бунтовничка група за војната во Газа не е променет по американско-британските напади врз Јемен.
„Нападите врз израелските бродови и бродовите кои одат кон пристаништата на окупирана Палестина ќе продолжат“, изјави Абдулсалам за британски медиуми.
По неговата изјава Агенцијата за поморски трговски операции на Обединетото Кралство (УКМТО) издаде предупредување за напад во близина на брегот на Јемен.
Пентагон подоцна потврди дека се работи за товарен брод, во сопственост на САД.
„Противбродска балистичка ракета истрелана од јеменските проирански Хути милитанти погоди транспортен брод во американска сопственост што пловел под знамето на Маршалските Острови“, објави Пентагон на социјалната мрежа Х, порано Твитер.
Во соопштението се наведува дека при нападот од бродот не се пријавени повредени или значителна штета и бродот го продолжил патувањето.
Најмалку шест танкери со нафта скршнаа од курсот или застанаа пред да влезат во јужниот дел на Црвеното Море од викендот, со што бројот на прекини во снабдувањето се искачи на најмалку 15 од почетокот на нападите на јеменските Хути минатата недела.