НЕМА ГОРИВО, СТРУЈА, ВОДА: Eксперт од ОН вели дека Палестинците чекаат да умрат во болниците во Газа

Добивај вести на Viber

Ранетите Палестинци умираат од нетретирани рани во преполните болници во Појасот Газа во услови на колапс на здравствениот систем.

Ова е став на експертот за здравствени вонредни состојби на Обединетите нации (ОН), Шон Кејси. Тој синоќа на прес-конференција во седиштето на Обединетите нации кажа дека бил сведок на влошување на ситуацијата и дека во болницата Ал-Ахли во градот Газа видел луѓе како лежат на „црковни клупи, во основа чекајќи да умрат, во болница што нема гориво, нема струја, нема вода“, има многу малку медицински материјали и само мал број преостанат персонал да ги негува. Ал-Ахли е единствената христијанска болница во Газа и единствената што лекуваше пациенти со канцер. 

Кејси, кој е службеник на Светската здравствена организација (СЗО), неодамна се врати од Газа, каде што помина пет седмици обидувајќи се да добие повеќе персонал и материјали за 16 делумно функционални болници.

Болницата Шифа во северниот дел на градот Газа, некогаш водечка болница на територијата, со 700 кревети, сега лекува жртви на траума и е полна со луѓе што ги напуштиле своите домови и живеат во операциони сали, ходници, на скали, изјави претставник на СЗО.

Како што објасни, по пет-шест лекари или медицински сестри дневно примаат стотици пациенти, претежно жртви на трауми, а на подот има толку многу пациенти што тешко се поминува без да им се згазне на рака или нога.

Минатата недела Кејси го посети медицинскиот комплекс Насер на југот во градот Кан Јунис, кој има 200 отсто зафатеност на креветите и само 30 отсто од персоналот, а пациенти лежат насекаде, на подот и по ходниците.

Тој оцени дека пред сѐ е потребен прекин на огнот за помош на ранетите Палестинци, кои ги има околу 60.000, а секој ден пристигнуваат по неколку стотици нови, покажуваат податоците на Министерството за здравство во Газа. Во Газа загинаа над 45.500 Палестинци. Палестинската терористичка група Хамас на 7 октомври лани го нападна Израел. Нивната цел е формирање на независна држава Палестина со главен град Ерусалим. Шефот на руската дипломатија,  Сергеј Лавров денеска се заложи за создавање палестинска држава, зборувајќи за ситуацијата во Газа на годишната прес-конференција.

foto EPA