Добивај вести на Viber
Никој во владата не сака да ја коментира последната одлука на Светска банка, која одобри кредит од 25 милиони евра за Македонија, но парите не може да се користат пред изборите. Министерството за финансии остана без коментар, а дополнителниот заменик-министер за финансии, Кире Наумов, посочува дека не сака да ја анализира одлуката на Светска банка и врз основа на неа да изведува заклучоци.
„Не би ги коментирал одлуките на КФВ банката и на Светската Банка. Исто, како што не ја коментирав ни одлуката на трите водечки светски банки, Сити Груп, Ерсте Банк и Дојче Банк, во улога на агенти при издавањето на четвртата еврообврзница. Меѓународните финансиски и банкарски институции имаат пристап многу поразличен од домашните финансиски институции“, вели Наумов, за Фактор.
Одобрениот кредит е наменет за инвестиции во локална инфраструктура, а со оглед дека следуваат избори, очигледно е дека и Светска банка не сакала тие пари да бидат искористени во предизборната кампања за проекти со кои власта би добила политички поени.
„Мислам дека ова е вообичаена пракса од Светска банка, да не се ослободуваат средства во предизборен период, за да се избегне можноста да се влијае на изборите. Ако се сеќавам добро, нешто слично имаше и во 2014 година. Мислам дека ова не се прави толку за да се оневозможи средствата да се користат за други намени (средствата се наменети за општините, не за централната влада, така што, не знам ни дали е можно ова), туку за да се спречи евентуален предизборен маркетинг, во стилот „еве, се гради“, вели Бранимир Јовановиќ за Фактор.
И додека меѓународните банки играат на картата на внимателност, се засилуваат задолжувањата на домашен терен.
„Не сакам да верувам дека под притисок на власта клиентите на домашниот пазар на капитал поинаку го пресметуваат ризикот за кредитирање на влада, која за период од осум години го дуплираше износот на јавниот долг, пред се за финансирање на непродуктивни расходи. Ваквото темпо на задолжување е предмет на сериозна загриженост во последните извештаи за економската состојба во Македонија на сите релевантни институции, вели Кире Наумов, дополнителен заменик министер за финансии.
Апелите на Наумов, упатени до банките засега не помагаат да се намали домашното кредитирање. А таквите апели од ВМРО-ДПМНЕ толкуваат како деструктивен обид на опозцијата, кој сепак не поминува со успех кај домашните кредитори. Од ВМРО-ДПМНЕ посочуваат дека СДСМ е во паника бидејќи не успева да го блокира нормалното функционирање на Македонија и преку закани до банките да се спречи исплатата на пензии, социјална помош, субвенции.
„Најтешко му е на Кире Наумов кога банките му делат воспитни, а во ЕУРОСТАТ мува не ги лази од неговото реноме за финансиска експертиза. Банките уште еднаш им покажаа на Кире Наумов и СДСМ дека не им веруваат на апокалиптичните сценарија и приказни, бидејќи само СДСМ умее да ја донесе Македонија на такво дереџе“, се вели во партиското соопштение на ВМРО-ДПМНЕ.
Министерството за финансии и на првата аукција на државни хартии од вредност што се одржа годинава, иако бараше 15,5 милиони евра, сепак на крајот од домашните кредитори зема 31 милиони евра. Од ресорното министерство не одговараат зошто се задолжија двојно повеќе од она што беше најавено и за шт ќе се трошат тие пари.
Р.Ф.