Ноев: Бродот во Скопје тоне, Македонија нема повеќе иднина на унитарна држава
Објавено во: Македонија 09 Март, 2017
Македонија треба итно да побара превентивна и стабилизирачка мисија на Европската Унија во земјата, изјави поранешниот министер за одбрана и амбасадор на Бугарија во НАТО, Белгија и Луксембург, Бојко Ноев, за бугарската новинска агенција „Фокус“.
Писмото на претседателот Ѓорге Иванов до Европскиот совет, САД, НАТО и до Турција, Ноев го оценува како „своевиден СОС-сигнал испратен до меѓународната заедница дека бродот во Скопје тоне“.
„Тоа е драматично признание дека земјата е на работ на целосно безвластие. Политичката криза, која ја набљудуваме веќе подолго време, ескалира до состојба во која Република Македонија практично го губи својот суверенитет“ - смета Ноев.
На прашањето дали причините за ваквата состојба се надворешни, како што тврди Иванов во писмото, Ноев вели дека причините во најголем дел се внатрешни и не се едноставни.
„Владејачката елита остави сè да потоне поради комплексот на инфериорност, геополитичката кусогледост, провинцијализмот и личната алчност. Тоа ја ослабна и дополнително ја подели земјата и денес ги гледаме резултатите. Се разбира, има и надворешни причини, кои сепак се второстепени. Ако си силен внатре, однадвор не можат да те уплашат“ – вели Ноев.
Тој заклучува дека Македонија нема повеќе иднина на унитарна држава, додавајќи дека кантонизацијата веќе почнала практично да се спроведува и прашањето е дали конечната разделба ќе се оствари по мирен или по насилен пат.
Интересот на Бугарија, вели Ноев, е во Македонија да нема недостиг на државност, да нема војни и насилство, кои, како што нагласува, ќе се рефлектираат и на неговата земја – физички и емоционално.
Тој вели дека им е важно во Македонија да биде мирно, затоа што според него во земјава живеат илјадници Бугари.