НОВ БЛОК СО АКЦИИТЕ НА КОМЕРЦИЈАЛНА БАНКА - кој плати 57 илјади евра за 121 акција

Добивај вести на Viber

Откако кон крајот на минатата недела на Берзата поминаа два блока од по 200 акции и по цена од 29.000 денари за акција на Комерцијална банка, денеска повторно блок со акциите на таа банка.

За однапред познат купувач се продадени 121 акција, овој пат по повисока цена, од 29.100 денари за акција, или сето тоа прави вкупната зделка да изнесува над 57 илјади евра.

А, во текот на вчерашниот ден на редовниот пазар имаше благо намалување на цената, таа изнесуваше 28.713,35 денари за акција, при што биле истргувани 358 акции.

Акциите на Комерцијална банка се барани затоа што тоа акционерско друштво е исклучително профитабилно и има одлична дивидендна репутација, а цената постојано оди нагоре, така што има одлична можност за остварување на капитални добивки. 

Како што веќе пишуваше Фактор, петокот беше прилично „плоден“ на Македонската берза. И по промет, и по блокови, и по постигнати цени на акции. Акциите на Комерцијална банка тогаш надминаа 29 илјади денари за акција. На берзата поминаа две блок трансакции во кои за однапред познат купувач се продадоа по 200 акции на банката, или вкупно 400, по идентична цена од по 29 илјади денари за акција. Значи, некој или некои за 400 акции на Комерцијална банка плати вкупно околу 190 илјади евра. На редовниот пазар во петокот исто така беше „жестоко“, па акциите таму достигнаа по 29.032 денари за акција, а се продадоа 686 акции, што значи дека и на тој пазар е остварен промет од 324 илјади евра.

Н.Н.Ф.