Нов раст на долгот на централната Влада, стаса до 33,9% БДП

Добивај вести на Viber

Мартовски раст на јавниот долг на Централната Влада. Според најновите податоци што ги објави Министеството за финасии, заклучно со првиот квартал од оваа година долгот на Централната Влада достигна 33,9% од Бруто Домашниот Производ или 2 милијарди и 703 милиони евра. Анализата на трендот на движење покажува дека во првите три месеци од годинава (прв квартал) во споредба со крајот на 2012 та година салдото на овој долг се зголемило за речиси 160 милиони евра. Заклучно со март, зголемување на долговите има и кон странство и на домашен терен. Надворешната задолженост изнесува 1 милијарда 673 милиони евра додека внатрешното задолжување на Владата достигна 1 милијарда и 29 милиони евра.  Само по основ на државни хартии од вредност (записи и обврзници), Владата должи 906 милиони евра на приватниот сектор, јавните претпријатија и банките. Јавниот Долг на Централната Влада со стапка од 33,9% од БДП претставува највисоко измерено ниво од 2005 та година,кога тој изнесуваше 38,4 отсто. По раздолжувањето на Македонија кон странските кредитори (ММФ и Лондонскиот Клуб на Доверители) во 2008 та година јавниот долг се намали на 20,6% но оттогаш до сега, тој е во постојан пораст. Дел од академската јавност, како и поранешниот гувернер на Народната Банка Петар Гошев во континуитет укажуваат дека податоците за јавниот долг на Централната Влада целосно не ја отсликуваат состојбата за вкупната задоженост на земјата, бидејќи со сегашната методологија не се опфатени задолжувањата на општините и на државните претпријатија и фирми. При последната посета на мисијата на ММФ во Македонија, шефицата Ивана Владкова Холар укажа дека Владата мора да увои Стратегија за управување со јавниот долг, документ кој е значаен за транспарентноста на задолжувањата како и за проекциите и плановите за нивна отплата. Д.А.