Нов скандал го тресе ЈП „Државни патишта“?Поминале 240 пати патарина без да платат

Добивај вести на Viber

Менде Илиевски од СДСМ денеска објави панорамски снимки со информација дека  за еден ден 40 возила 240 пати ги поминале наплатните пунктови за патарина на Јавното претпријатие Државни патишта без да платат.

Според СДСМ, ова се случувало на 29 ти септември 2024 година, на патарините на наплатните рампи во Петровец, Сопот, Отовица и Градско.

„Околу 240 ненаплатени пропуштања низ патарините само во еден ден на 40 возила кои биле пропуштени на широкопојасната лента со црвен семафор. Еве ги снимките од панорамските камери доставени од свиркачи до СДСМ. Јасно се гледаат сите поминувања. Ова е целосно спротивно на Законот и претставува самоволие на кадрите на Коце Трајановски и ВМРО-ДПМНЕ во Јавното претпроијатие.

Согласно член 66 од Законот за јавни патишта од патарина се ослободени само: возила со полициска придружба, возила означени на Армијата, полицијата, Царината, брзата помош, протипожарните служби, возила на заболени од законски дефинирани болести и лица со телесни оштетувања од 80% со соодветни книшки. Никој друг не е ослободен од патарина. Што значи има јасни законски ограничувања и никој надвор од овие законски прописи не може да ослободува возила да не платат патарина“, информираше Илиевски, кој додаде дека информацијата СДСМ ја добил од свиркачи.

Според опозицијата, наредбата за овие 40 возила да бидат 240 пати пропуштени низ патарините без да платат ја издал раководителот на наплатна служба, Ванчо Милевски, инаку кадар на ДПМНЕ.

„Врв на ова самоволие е пораката, испратена по Вибер апликација, до сите Одговорни на гореспоменатите наплатни станици, во која децидно е Наредено замислата на Раководителот да се спроведе.

Ова самоволие и прекршување на законот се случува во време кога се поднесени кривични пријави за 6 вработени во јавното претпријатие дека пропуштале возила на полицајци без да платат патарина“, додаде Илиевски.

Претходно СДСМ информираше и дека Миланчо Митревски шеф на контрола на наплатната служба на патарините во Петровец не ја плаќал оваа давачка кога ја минувал рампата.Од ЈПДП тогаш рекоа дека тој повеќе нема да биде шеф.