Нови стипендии за професионална обука на невработени жени од Чаир

Добивај вести на Viber

Општината Чаир обезбеди средства за стипендии со кои им се овозможува на 10 невработени жени, кои живеат на територијата на општина Чаир, да завршат тримесечна стручна обука од областите моделирање, стилизам, кроење и шиење во Институтот за мода „Изет Цури“. Проектот се реализира во соработка со Центарот за едукација и развој „Libraria e Carshie”.

Пријавите за учество на обуката, заинтересираните кандидатки треба да ги достават во Институтот за мода „Изет Цури“, најдоцна до 5-ти мај 2015 година. Пристигнатите апликации ќе ги разгледува комисија составена од претставник на Институтот за мода „Изет Цури“, Општина Чаир и Центарот за едукација и развој „Libraria e Carshie”.

Обуката ќе се изведува по програма на познатиот моден креатор Изет Цури, кој неколку децении успешно работи во Париз и чии креации се познати во светот.

Целта на оваа обука е на невработените жени во општината да им се овозможи да се стекнат со конкретни вештини и знаења, со што се создаваат реални перспективи за нивно вработување.

Досега, во рамки на овој проект кој се реализира со поддршка на Општина Чаир, повеќе од 30 млади невработени жени од општината се стекнаа со специфични вештини и квалификации, со што се овозможи нивно полесно вработување.