Новиот водич за голема лична моќ „Умешност на лутината“ од Билјана Велковска ќе биде промовиран во „Литература.мк“ во „Сити мол“

Добивај вести на Viber

Новата книга од областа на популарната психологија „Умешност на лутината: мал водич за голема лична моќ“ од м-р Билјана Велковска ќе биде промовирана на 20 октомври (четврток), со почеток во 19.30 часот, во „Литература.мк суперстор“ во „Скопје сити мол“. Промоторки на книгата, која е во издание на „Арс Либрис“, дел од „Арс Ламина – публикации“, ќе бидат доц. Мирјана Јовановска Стојановска (психолог/психотерапевт и претседател на Комората на психолози на Македонија) и м-р Дора Попова Узуновски (психолог/психотерапевт). Настанот ќе го води уредничката на изданието, Татјана Димовска-Атанасова.

Ова е втора книга на Велковска, по „Психосоматика, емоции што разболуваат и лекуваат“, исто така во издание на „Арс Ламина“.
„Умешност на лутината“ е спој на научна теорија и истражувања, како и на лични искуства. Во фокусот на книгата, според зборовите на авторката, е најмалку разбраната човечка емоција – лутината. Оваа дива емоција, тешка за скротување, може да биде корен на многу наши дисфункционалности, но и извор на нашата лична моќ. Книгата ја дисекцира емоцијата лутина и начините на нејзино изразување – потиснување, задржување на лутината, пасивно-агресивен стил, конструктивна лутина – и посочува како да добиеме најмногу од својата лутина.

Една од рецензентите на книгата, доц. Мирјана Јовановска Стојановска, вели дека „Умешност на лутината“ нè води на мало патување, а првата станица е: лутината.
–Преку примери од секојдневието, книгата ни открива слој по слој од лутината. Откако ќе ја прочитаме сфаќаме дека патувањето со „Умешност на лутината“ било патување во самите нас. Наша е лутината, наш е изборот што ќе правиме со неа. Негирањето на нашата лутина е негирање на себеси. Одењето против својата лутина е одење против самите нас. Да се разбере и да се прифати лутината значи да се разбереме и да се прифатиме себеси. Книгава нè повикува: Принесете ги на олтарот на Вистината своите заблуди, погрешни сфаќања, искривената слика за себеси, тајните, мачнината, самокритиката. „Умешност на лутината“ едноставно и ненаметливо нè повикува на своевидна „револуција“ – вели таа.

Психологот/психотерапевт Дора Попова Узуновски нагласува дека „Умешност на лутината“ е како амалгам од повеќе книги, па му го дава на читателот, без да губи многу време, она најпотребното што би го извлекол за себе од сите тие книги заедно. Практичноста е негова силна страна.
– „Умешноста на лутината“ е ретко дело наменето за пошироката читателска публика, а сепак според својата содржина не спаѓа во класичната комерцијална литература меѓу книгите за самопомош. Впрочем, и не може да спаѓа затоа што обработува „жешка“ тема што со векови е репресирана, неразбрана, неизживеана и нетрансформирана. За да се разбере гласот на лутината, нејзината умешност и конструктивната примена ни се потребни веројатно уште многу милениуми, сè додека човекот не одлучи да се откаже од својот првобитен егоцентризам, кој донесува најразлични неправди, за кои подоцна тешко му е да преземе одговорност. Токму поради тоа, овој водич е особено важен да се има на полицата во секоја домашна библиотека, бидејќи во исто време е пред самото време, но и сосема навремен, имајќи предвид дека е време да се почне еволуција на лутината – се вели во освртот на Попова Узуновски.

Билјана Велковска дипломирала општа и компаративна книжевност на Филолошкиот факултет „Блаже Конески“ во Скопје, а магистрирала клиничка и советодавна психологија на Меѓународниот славјански универзитет. Во 2019 година ја објави „Психосоматика, емоции што разболуваат и лекуваат“, нејзиното прво дело, плод на повеќегодишно истражување на една многу важна и неправедно занемарена тема: конекцијата помеѓу телото и умот.

Книгата „Умешност на лутината: мал водич за голема лична моќ“ е достапна во сите книжарници на „Литература.мк“, како и онлајн на следниот линк:
https://www.literatura.mk/BookDetails.aspx?Pr=14939


ПР објава